Tuesday, 3 September 2013

PROF. JULIETA GYULAMIRYAN'S VISIT (Armenian)

News from the Armenian Classroom...

ՏՈՔՏ. ՓՐՈՖ. ՏԻԿԻՆ ՃՈՒԼԻԷԹԱ ԿԻՒԼԱՄԻՐԵԱՆ`
ՄԵՐ ՄԷՋ

Օգոստոս ամսուայ առաջին երեք շաբաթներուն ընթացքին, Հ.Բ.Ը.Մ. Ալեքսանտր Վարժարանի ուսուցչական կազմն ու աշակերտութիւնը, մեծ հաճոյքն ու բախտաւորութիւնը ունեցան վայելելու ներկայութիւնը, Հայրենիքէն յատկապէս Սիտնի գործուղուած` Մանկավարժուհի եւ Հայոց Լեզուի եւ Տարրական Ուսուցման Մեթոտի մասնագետ Տոքտ. Փրոֆ. Տիկ. Ճուլիէթա Կիւլամիրեանը:

Տիկ. Ճուլիէթան` իր Աւստրալիա ժամանման յաջորդ օրն իսկ, արդեն լուծուեցաւ աշխատանքի, ի շահ Սիտնիի բոլոր Հայկական վարժարաններու ուսուցչական կազմերուն, որոնց հետ անհատական եւ հաւաքական հանդիպումներ ունենալով, փոխանձեց իր երկար տարիներու մանկավարժական մասնագիտութեամբ մօտեցումները եւ Հայերէն լեզուի դասաւանդման ու խօսքի զարգացման մեթոտները:

Սփիւռքի այս հեռաւոր ափերուն վրայ, մենք` ուսուցիչներս շատ կարեւոր դեր մը ունինք, միշտ վառ պահելու մեր ազգային ոգին, որպէսզի կարողանանք մեր նոր սերունդին փոխանձել այն ամէնը, որ մեր պապերէն հասած են մեզ.-

{ Հայաշունչ մթնոլորտի մէջ իրենց տալ մեր ոսկեղնիկ մայրենի լեզուն, հարուստ գրականութիւնն ու դարաւոր պատմութիւնը:
{ Ծանօթացնել մեր ազգային եւ պատմական դէմքերուն:
{ Եւ իրենց զինել Հայ ազգի զաւակ ըլլալու հպարտ հոգիով:

Հայրենիքէն հեռու ըլլալով մեր ուղղին բաւական դժուար է ու խոչընդոտներով լի: Թէեւ մենք մեր կարելին կ’ընենք այդ դժուարութիւնները յաղթահարել եւ հասնիլ մեր նպատակակէտին, սակայն վերապատրաստման այսպիսի ծրագիրներ մեզ կը վերանորոգեն եւ կը զինեն հոգեկան նոր ուժով մը, աւելի աշխուժութեամբ եւ նոր մեթոտներով շարունակելու եւ կատարեալին հասցնելու մեզ յանձնուած առաքելութիւնը:

Հաճելի էր դէպի դպրոց ճամբորդութիւնը, այս երեք շաբաթուան Երկուշաբթի եւ Հինգշաբթի առաւօտները, երբ Տիկին Ճուլիէթան կ’ընկերանար ինձ եւ մենք միասին խօսելով եւ մտքեր փոխանակելով` աւելի ճիշդ իր հարուստ գիտելիքներէն ես օգտուելով, մենք կը հասնէինք դէպի դպրոց, առանց զգալու մեր ճամբորդութեան երկարութիւնը:

Հ.Բ.Ը.Մ. Ալեքսանտր Վարժարանէն ներս Տիկին Ճուլիէթան ներկայ գտնուեցաւ Արեւմտահայերէն, Արեւելահայերէն եւ Հայոց Պատմութեան պահերուն, իր խրախուսական ու քաջալերական խօսքերով, իր մանկավարժական հարուստ գիտելիքները մեր հետ կիսուելով, ոչինչ խնայեց մեզ ոգեւորելու եւ մեր ուղղին աւելի դիւրացնելու, որպէսզի աշակերտ եւ ուսուցիչ աւելի դիւրութեամբ կտրենք Հայերէն լեզուի ուսուցման եւ իւրացման լուսաւոր ու գեղեցիկ ճամբան:

Տիկին Ճուլիէթայի երեք շաբաթուայ ներկայութիւնը` մեր մէջ ձգեց քաղցր յուշեր եւ մանկավարժական հիանալի դասաւանդման մեթոտներ, որոնք վստահաբար որպէս թանկարժէք գանձեր պիտի մնան մեր մէջ եւ հնարաւորութիւն պիտի տան մեզ կազմակերպուելու եւ դիւրացնելու մեր ուսուցման ուղղին, իսկ աշակերտին գրաճանաչութեան, ընթերցանութեան եւ խօսքի զարգացման յաջող ուղղին:

Շնորհակալութիւն Տիկին Ճուլիէթա: Թող Բարձրեալն Աստուած ձեզ պարգեւէ երկար տարիներու առողջ եւ երջանիկ օրեր, որպէսզի շարունակէք ձեր նուիրական ու հայապահպան առաքելութիւնը:

Սեդա Քէօշկէրեան


No comments:

Post a Comment